د هلمند د نادعلی ولسوالی کې د ۶.۶۵ کیلومتر زابر پاکولو پروسه پیل شوه
۱۵ وږی ۱۴۰۳ ه.ش
۲ ربیع الاول ۱۴۴۶ ه.ق
د هلمند ولایت په نادعلی ولسوالی کې د ۱۵۰ کسانو په مټ د ۶.۶۵ کیلومتره زابر پاکولو چارې پیل شوې، چې موخه یې د ځمکې حاصلاتو زیاتول او د اضافي اوبو تخلیه کول دي.
دا پروسه د هلمند ولایت د کرنې او اوبولګولو ریاست او د سور صلیب نړیوالې کمیتې په همکارۍ ترسره کېږي. دغه زابر د زرګونه جریبه ځمکې اضافي اوبه تخلیه کوي، چې د ځمکې د اصلاح او حاصلاتو د ښه والي لامل ګرځي.
د زابر پاکولو چارې به د ۴۰ ورځو په ترڅ کې د ۱۵۰ تنو ځایي کاریګرو په همکارۍ سرته ورسیږي، چې هر کارګر ته د ورځې ۵۰۰ افغانۍ ورکول کېږي. د دې پروسې له لارې، د نادعلی ولسوالی لسګونه ځایي خلکو ته د کار فرصتونه برابریږي او د اوبو د رطوبت له امله کم حاصلات لرونکي ځمکې به بیا فعاله شي.
