د ملي پراختیا شرکت له خوا د قوشتېپې کانال په ځمکه د کرنیز او صنتعي کمپلسکونو جوړولو په پار غونډه دائره شوه
۶ وږی ۱۴۰۳ه.ش
۲۳ صَفَر المُظَفَّر ۱۴۴۶ه.ق
دکرنې، اوبولګولو او مالدارۍ وزارت د اراضۍ لوی رییس مولوی محمود مظلوم په مشرۍ؛ د جيوديزي او کدستر عمومي رییس مولوي سعید الرحمن مظهري، د کرنې وزارت د څړځايونو د تنظيم رییس سيد احمد خالد صاحب زاده، د ملي پراختيا شرکت د تفتیش رییس روح اللّٰه حبیب، د دغه شرکت د املاکو رییس مصري خان همت، د ياد شرکت د سوداګرۍ او پانګونې رییس فیضان الحق فیضان او د کرنې وزارت د اراضۍ لوی رياست یو شمېر سلاکارانو په شتون کې د ملي پراختیا شرکت له خوا د قوشتېپې کانال په ځمکه د کرنیز او صنتعي کمپلسکونو جوړولو په پار غونډه د اراضۍ لوی ریاست کې دائره شوه
په پیل کې د اراضۍ لوی رییس مولوي محمود مظلوم د ملي پراختيا شرکت لخوا د دغه سترې پروژې چې غواړي د قوشتېپې کانال په ځمکو باندې چې د هېواد له درېیو ولايتونو بلخ، جوزجان او فاریاب څخه تېرېږي کرنیز او صنعتي کمپلیکسونه جوړ کړي ستاينه وکړه او دا کار يې د هېواد د پرمختګ په برخه کې لوی ګام وباله.
د ځمکو چارو لوی رییس وويل: «نن چې په هېواد کې په پوره توګه امنیت تامین دی نو لازمه ده چې له دې فرست څخه په پوره توګه ګته پورته کړو او زیار وباسو چې هېواد او خلکو ته د خدمت کولو جوګه شو.»
ښاغلي مظلوم زیاته کړه د هېواد په کچه په څو لسیزو کې دا لومړی ځل دی چې د داسې سترې پروژې د پیلېدو شاهدان يو نو له ټولو مسؤلینو څخه غواړم چې په خپلو مسؤلیتونو کې له پوره دقت، شفافيت، اخلاص او چټکتيا څخه کار واخلي او هېڅکله هم له خپلو دندو څخه ناوړه استفاده ونکړي.
ورپسې د ملي پراختيا شرکت مسؤلینو د يادې طرحې په اړه چې د دوی له لورې جوړه شوې او غواړي د قوشتېپې کانال په ځمکو باندې کرنیز او صنعتي کمپلکس جوړ کړي خبرې وکړې او د دغه طرحې د لاښه تطبيق په موخه يې خپل نظرونه هم د کرنې وزارت او اراضۍ ادارې له مسؤلینو سره شريک کړل.
نوموړو وويل: «د ملي پراختيا شرکت هوډ لري، چې د قوشتېپې کانال په ځمکو کرنیز او صنعتي کمپلیکسونه جوړ کړي ترڅو په دغو ځمکو باندې هر ډول مېوه لرونکي ونې، طبیعي او غیر طبيعي نباتاتو د کښت او پروسس په برخه کې کار وکړي تر څو يو خوا سوداګرو او پانګوالو ته د کار او پانګونې زمینه برابره شي او بلخوا د هېواد د پرمختګ په برخه کې هم کار شوی وي».
په پای کې د اراضۍ لوی رییس د ملي پراختيا شرکت له مسؤلینو څخه وغوښتل، چې په هر ولايت کې څومره او څه ډول ځمکه چې دوی ته اړتیا وي موضوع دې دکرنې وزارت د اراضۍ ادارې مقام سره شريک کړي ترڅو د هغو ځمکو د تثبيت او تصفيې په برخه کې لازم اجراآت ترسره شي.
همدارنګه يې له مسؤلینو څخه وغوښتل، چې د دواړو ادارو څخه يو ګډ پلاوی دې يادو ولايتونو ته سفر هم وکړي ترڅو سيمه له نږدې تشخيص او بررسي او وروسته له هغه خپل راپور د راتلونکو کړنو په موخه د اراضۍ لوی رياست له رهبري سره شريک کړي.
