د پکتیا  د کرنې ریاست دکرنې متخصص د کړنو او فعالیتونو ارزونه وشوه

د کرنې وزارت د مقام سلاکار شفیع الله مهمند په مشرۍ پلاوي، چې د کرنې وزارت دکرنې او مالدارۍ تخنیکي سلاکار شکرالله وزیري او د اوبولګولو او طبیعي سرچینو د مرستیالۍ د استازي په شتون کې پکتیا ولایت ته د سفر په ترڅ کې ددغه ولایت دکرنې، اوبولګولو او مالدارۍ ریاست دکرنې متخصصینو او د کارکوونکو د کړنو ارزونه یې وکړه.
د کرنې وزارت د مقام سلاکار شفیع الله مهمند وویل، چې ددې سفر موخه د کرنې ولایتي متخصصینو د کړنو اولاسته راوړنو هراړخیزه ارزونه او بررسي، چې د پکتیا ترڅنګ نورو ولایتونو ته هم غځېږي.
په ورته وخت کې یاد پلاوي د پکتیا ولایت د کرنې ریاست د بېلابېلو څانګو له کارکوونکو سره د کتنې په ترڅ کې له هغوی څخه وغوښتل، چې خپلې تجربې او کاري مهارتونه له یو بل سره شریک او د کرنې وزارت له مسئولینو سره د کرنې د ودې او پراختیا په برخه کې همکاري وکړي، ترڅو د افغانستان د کرنې او مالدارۍ سکتور ته وده او پراختیا ورکړي.
شفیع الله مهمند وویل: «پکتیا ولایت ته زموږ د سفر موخه د یاد ولایت د کرنې او مالدارۍ وضعیت او پرتې ستونزې له نږدې کتل دي، تاسو هم کولی شئ خپلې ستونزې او اړتیاوې موږ ته ووایاست او موږ ته یې ولیکئ، ځکه چې د امارت مشرتابه ټولو برخو ته پاملرنه کوي، خو فعالیتونه د اړتیا او لومړیتوب پر بنسټ پلي کېږي.»
په همدې حال کې د پکتیا د کرنې، اوبولګولو او مالدارۍ رییس مولوي سیدامین هاشمي د پکتیا د کرنې ریاست د فعالیتونو او لاسته راوړنو راپور د کرنې وزارت یاد پلاوی  ته وړاندې کړ او د پکتیا د کرنې او مالدارۍ سکټور ته د دغه وزارت د رهبرۍ د لا زیاتې پاملرنې غوښتنه وکړه.
همدارنګه د یاد ریاست کارکوونکو د خپلو اړونده آمریتونو او مدیریتونو ستونزې او وړاندیزونه شریک کړل، راغلی پلاوي دوی ته ډاډ ورکړ چې یادو ستونزو ته به یې په خپل وخت رسېدنه ووشي.
دغه پلاوی چې د بزګرانو او مالدارانو د وضعیت د څېړنې او د ولایتي متخصصینو د کړنو او فعالیتونو د ارزونې په پار پکتیا ولایت ته تللی دی، د پکتیا ولایت د کرنې، اوبولګولو او مالدارۍ ریاست دکرنې متخصص او د کارکوونکو کړنې وارزولې او د چارو د لا ښه والي په موخه یې دوی ته لازمې لارښوونې وکړې.