هلمند کې د طبیعي کبانو د نسل زیاتولو په پار هڅې

هلمند کې د کبانو د نسل زیاتېدو او په عمومي او فرعي کانالونو کې د اصلاح شویو کبانو روزلو په موخه په مرکز لښکرګاه او ګڼو ولسوالیو کې عمومي بغرا، کانالونو او لویو ویالو کې  د کبانو ٣٠ زره بچیان واچول شول.
دا چې هلمند د اوبو له پلوه غني ولایت دی او په دې وروستیو کې ددې ولایت په عمومي او فرعي کانالونو کې د طبیعي کبانو نسل مخ په ورکېدو ؤ، ددغه کبانو د ډېرولو په موخه نږدې ٣٠ زره چوزه په داسې حال کې چې د کرنې ، اوبو لګولو او مالدارۍ رییس ترڅنګ د مالدارۍ او حیواني روغتیا آمر او ګڼو نورو کارکونکو هم حضور درلود عمومي او فرعي کانالونو ته واچول شول.
دغه کبان به په طبیعي ډول په یادو کانالونو کې روزل کېږي او ورسره سم به یې په نسل کې زیاتوالی راشي.
دغه چارې په داسې حال کې ترسره کېږي، چې څو ورځې وړاندې په دې ولایت کې د کرنې، اوبولګولو او مالدارۍ رییس په لارښؤنه د طبیعي کبانو پر ښکار بندیز ولګېد.