کندهار کې لبني محصولاتو ته د بازار موندنې په موخه د شېدو ټولولو مرکزونه جوړ شول
۱۶ غبرګولی ۱۴۰۳ه.ش
۲۸ ذوالقعده ۱۴۴۵ه.ق
د کندهار د کرنې، اوبولګولو او مالدارۍ ریاست په هڅو د افغانستان لپاره د هالینډ کمیټې په تخنیکي همکارۍ ددې ولایت په درېیو ولسوالیو کې د شېدو ټولولو مرکزونه جوړ او ګټې اخیستنې ته وسپارل شول.
د کندهار د کرنې، اوبولګولو او مالدارۍ رییس الحاج مولوی فضل الباري فضلي وویل، چې د شېدو ټولولو یاد مرکزونه د کندهار ولایت د ډنډ، پنجوایي او سپین بولدک ولسوالیو کې جوړ شوي دي.
ښاغلی فضلي وویل، چې د یادو مرکزونو جوړولو موخه د مالدارۍ سکتور پیاوړتیا، حیواني محصولاتو ته بازار موندنه، کاري فرصتونو برابرولو او د خوړو خوندیتوب رامنځته کول دي.
دافغانستان لپاره د هالینډ کمېټه د شېدو راټولولو مرکزونو سربېره د مالدارۍ سکتور غښتلتیا لپاره په بېلابېلو برخو کې مرستې کوي.
