د هلمند ګرشک کې د کب روزنې ۲۵۳ فارمونه فعالیت کوي
۹ غبرګولی ۱۴۰۳ه.ش
۱۰ ذوالقعده ۱۴۴۵ه.ق
هلمند کې د کب روزنې د فارمونو وضعیت ارزونې په دوام، ددې ریاست اړوند د مالدارۍ او حیواني روغتیا آمریت کارکوونکو له لوري د ګرشک ولسوالی لسګونو فارم لرونکو ته مسلکي معلومات ورکړل شوي دي.
د هلمند دکرنې ریاست د چارواکو په خبره ددې ولایت د ګرشک په ولسوالی کې نږدې ٢٥٣ د کب روزنې فارمونه شتون لري، چې دغو فارمونو کې سلګونه کسان په مستقیم ډول په کار بوخت دي.
ددې لیدنې پر مهال یادو فارم لرونکو ته د کبانو خوراکې ورکولو، د اوبو دمناسبې اندازې برابرولو، د کبانو د ناروغیو مخنیوی او بازار ته د کبانو وړاندې کولو برخه کې لازمې لارښؤنې او سپارښتنې وشوې.
په ورته وخت کې یادو فارم لرونکو غوښتنه وکړه، چې له دوی سره دې د کبانو خوراکې ترڅنګ دکبانو ښو نسلونو په برخه کې مرسته او همکاري وشي.
د هلمند د کرنې ریاست په دې ولایت کې د کبانو د صنعت د پراختیا په پار ډېرې هلې ځلې کوي، چې تر دې مهاله یې یو شمېر کسانو ته په دې برخه کې د روزنې ترڅنګ د بېلابېلو اړینو توکو وېشلو زمینه هم برابره کړې ده.
