د هلمند مرکز لښکرګاه پر ۸۷ بڼوالو د بڼوالۍ اړونده توکي ووېشل شول

۱۵ تله ۱۳۹۸
د هلمند د کرنې، اوبولګولو او مالدارۍ ریاست ددې و لایت د مرکز لښکرګاه ۸۷ بڼوال د انګورو د ناروغیو او افتونو دهر اړخیز کنټرول په موخه تر عملي روزنې وروسته پر دغو بڼوالو د بڼوالۍ اړونده توکي هم وېشلي دي.
دغه توکي، چې د بدیل معیشت پروګرام یا مرسي کورپ (MC) په همکارۍ پر دغو بڼوالو وېشل شوي دي په کې محافظتي جامې، عینکې، دستکشې، موزې، د ښاخبری قیچې، ماسک، محافظتي خولۍ او زینه شامل دي.
د هلمند دکرنې ریاست هلې ځلې کوی، چې روزنیزو پروګرامونو سره د بڼوالو وړتیا لوړ او د دوی د بڼونو محصولات ډېر او ښه کړي، چې هم د بڼوالو عواید زیات شي هم بزګران مشروع کرکېلي ته مخه کړي.
ددغو مرستو د وېش موخه د بڼوالو ملاتړ او په دې ولایت کې د بڼوالۍ د محصولاتو معیاري کول دي.
له دغو توکو څخه برخمن شوي بڼوال د کرنې وزارت له هلوځلو څخه د منني ترڅنګ ژمنه وکړه، چې د بڼوالۍ د حاصلاتو د زیاتوالي په پار به هلې ځلې ډېر کړي.