د پکتیکا دکرنې ریاست؛ ګیان کې د اوبولګولو پروژې چارې په بشپړېدو دي
١۶ غویی ۱۴۰۳ه.ش
٢۶ شَوّال المُکَرَّم ۱۴۴۵ه.ق
د پکتیکا دکرنې، اوبولګولو او مالدارۍ ریاست وایي، چې ددې ولایت د ګیان په ولسوالی کې د ملګرو ملتونو د خوړو او کرنې ادارې په مالي او د «هېټلو» مؤسسې په تخنیکي همکارۍ د اوبولګولو د یوشمېر پروژو چارې پیل شوي دي، چې رغنیزې چارې یې په چټکۍ روانې دي او ډېر ژر به ګټې اخیستنې ته وسپارل شي.
د پکتیکا دکرنې ریاست د چارواکو په خبره په دغو پروژو کې د کانالونو جوړول او بیارغول شامل دي، چې ورسره د دې ولسوالی لسګونو اوسیدونکو ته دکار زمینه هم برابره شوې ده.
دا په داسې حال کې ده، چې د افغانستان اسلامي امارت د موسمي او باراني اوبو مدیریت په پار د هېواد په کچه پروژې په لاره اچولي دي، چې په کې د چک ډېمونو، وړو بندونو او کانالونو جوړول شامل دي.
