خوست کې د طبیعي سرچینو مدیریت په پار پروژې پلي شوي

۹ کب ۱۴۰۲ه‍.ش
۱۷ شَعبان المُعَظّم ۱۴۴۵ه‍.ق
د خوست دکرنې، اوبولګولو او مالدارۍ ریاست د سویس پراختیایي ادارې «اس،ډي،سي» په همکارۍ ددې ولایت د صبریو ولسوالی کې د طبیعي سرچینو مدیریت په پار یوشمېر پروژي پلي او ګټې اخیستنې ته سپارلي دي.
  د خوست د کرنې ریاست چارواکي وایي، چې په دغو پلي شویو پروژو کې د واټرشیډ په سیمه کې د باران او واورې د اوبو زېرمه کولو په پار ۱۴ زره او ۱۱۹ متر مکعب ترینچونه کېندل شوي، دغه راز په دې سیمه کې د چهارمغزو نږدې څلور زره نیالګي کېښودل شوي او ترڅنګ یې د واټرشید په سیمه کې د رشقې ۲۰۴ کیلوګرامه تخمونه هم کرل شوي دي. ددې ترڅنګ د وچو نیالګیو پرځای د بادامو ۲۳۸۵ دانې نیالګي کرل شوي او دغه راز د واټرشید مدیریت په برخه کې ۲۵۰ کسانو ته په بېلابېلو برخو کې د وړتیالوړونې روزنیز پروګرامونه هم ترسره شوي دي.
د یادو چارو ترڅنګ د غیرماهرو کاریګرو لپاره د کار اړونده توکي، چې په کې کلنګ، بیلچې، ښاخۍ، متر، روغتیایي کېټ او نور اړین توکي وېشل شوي دي.
ددغو پروژو د پلي کولو په ترڅ کې ۱۱۰ ماهرو او ۷۳۵۸ غیر ماهرو کسانو ته د کار زمینه هم برابره شوې وه.
ددغو پروژو د پلي کولو موخه ددې ولایت د طبیعي سرچینو خوندیتوب او پراختیا او په ټوله کې خلکو ته د کار زمینه برابرول ښودل شوی دی.