د کندهار دکرنې رییس ددې ولایت بزګرانو ته؛ ستاسو ستونزې د امارت تر مشرتابه رسوم

۷ مرغومې ۱۴۰۲ه‍.ش
۱۵ جُمَادَى الثاني ۱۴۴۵ ه‍.ق
دکندهار دکرنې، اوبولګولو او مالدارۍ رییس مولوی فضل الباري فضلي د خپل کار په دفتر کې ددې ولایت د یوشمېر ولسوالیو له بزګرانو سره په لیدنه کې د دوی ستونزې او نظرونه واورېدل.
ددې لیدنې په ترڅ کې د کندهار دکرنې، اوبولګولو او مالدارۍ رییس مولوی فضل الباري فضلي بزګرانو ته په خطاب کې وویل، چې د دوی ستونزې د امارت تر مشرتابه رسوي.
ښاغلی فضلي وویل: «کندهار د بزګرې او مالدارۍ لپاره مناسبه اوبه او هوار لري. اوس په دې ولایت کې د نورو کرنیزو توکو ترڅنګ انجه، زعفران او یوشمېر نور ارزښت لرونکي بوټي هم کرل کېږي، چې د بزګرانو اقتصادي وده کې مرسته کوي.»
مولوی فضل الباري فضلي د کندهار ولایت بزګرانو ته وویل، د کندهار دکرنې ریاست چمتو دی، چې په هره برخه کې لا تاسو سره همکاري وکړي او ستاسو ستوزې هوارې کړي.
په همدې حال کې یادو بزګرانو د کندهار دکرنې رییس او کارکوونکو څخه مننه وکړه، چې د دوی ستونزو ته رسېدنه کوي او غږ یې اوري.
دکندهار دکرنې، اوبولګولو او مالدارۍ ریاست ددې ولایت د بزګرانو او مالدارانو ستونزو هوارولو په پار نه ستړې کېدونکې هلې ځلې پیل کړي دي.