هلمند کې د ځمکو د غصب مخنیوي تخنیکي پلاوی غونډه دائره شوه
د هلمند ولایت د ځمکې د غصب مخنيوي او غصب شویو ځمکو د تثبیت تخنیکي پلاوي خپله ۸۸مه نوبتي غونډه ترسره کړه.
په یاده غونډه کې د یادې کمېټې رییس الحاج مولوي نظر محمد صدیقي تر څنګ نورو غړو هم حضور درلود.
ددې غونډې په ترڅ کې تخنیکي پلاوي په ګڼو موضوعاتو او دوسیو باندې بحث او خبرې اترې وکړې.
په دې غونډه کې د کجکي بند په سیمه کې د استملاک شویو ځمکو د ٥٠٠ کورنیو پر موضوع بحث او خبرې وشوې او په اړه یې راتلونکي غونډې ته د اړتیا وړ معلوماتو د چمتو کولو او وړاندې کولو سپارښتنې وشوې.
د غونډې په ترڅ کې دغه راز له مرکز څخه د اړونده موضوعاتو د څېړلو لارښود ګډونوالو ته تشریح شو تر څو وروستۍ کړنې د یاد لارښود مطابق عیار کړل شي.
ددې ترڅنګ تخنیکي پلاوی د کاریز په سیمه کې د ٥٣٦ جریبه ځمکې موضوع باندې بحث وکړ چې شخصي اشخاص یې د ملکیت دعوی کوي په دې برخه کې د لا زیاتو څېړنو او ارزونو پریکړه وشوه.
وروستیو کې تخنیکي پلاوی دتېر په څېر د یو شمېر ولسي وګړو املاکي ستونزې هم واورېدې او د موضوعاتو حل په موخه ورته د اصولي کړنو ډاډ ورکړل شو.
