د ننګرهار دکرنې رییس دخوړو نړیوال پروګرام مسؤل سره وکتل
٣٠ لیندۍ ۱۴۰۲ه.ش
٨ جُمَادَى الثاني ۱۴۴۵ ه.ق
دننګرهار د کرنې، اوبولګولو او مالدارۍ ربیس مولوي عبدالستار محمد د خپل کار په دفتر کې د خوړو نړیوال پروګرام د ختیځ زون مسؤل داکتر محمد ناصر عطايي سره په کتنه کې د بېرو ځنګلونو، ګودامونو او ځینو نورو مهمو موضوعاتو خبرې اترې وکړې.
په دې کتنه کې د خوړو نړیوال پروګرام د ختیځ زون مسؤل داکتر محمد ناصر عطایي په کرنه کې د خپلو پروژو په تړاو معلومات وړاندې کړل. ښاغلی عطایي وویل، دوی په ننګرهار کې پر ۳۱۰ جریبه ځمکه د بېرو ځنګلونه جوړکړي، ددي ترڅنګ ورته د څاڅکو اوبخور سیستمونه هم جوړ کړي دي.
نوموړي زیاته کړه دوی ۶۰۰۰ اصله د ستروسو ونو بڼوالۍ هم ترسره کړې ده؛ چې د سیمي د ښکلا ترڅنګ به تریو بریده د ستروسو په برخه کې پرځان بسېا شو.
دغه راز عطایي د بیا ځل لپاره د خوراکي توکو د ګودامونو د دقرارداد غوښتنه وکړه او هم یي د شاتو مچیو ۱۰۰ صندوقونو د ورکړي ژمنه وکړه.
د ننګرهار دکرنې، اوبولګولو او مالدارۍ رییس مولوي عبدالستار محمد د خوړو نړیوال پروګرام له مسؤلینو د منني ترڅنګ د قانون په رڼا کې د هر راز همکارۍ ډاډ ورکړ.
