میدان وردګو ولایت کې د غنمو ۲۰ ننداریزې کروندې جوړېږي

۳۰ لړم ۱۴۰۲ه‍.ش
۸ جُمَادَى الأول ۱۴۴۵ ه‍.ق
دمیدان وردګو ولایت دکرنې، اوبولګولو او مالدارۍ ریاست د ترکیې جمهوریت د همغږۍ او همکارۍ ادارې (ټیکا) په همکارۍ  په دې ولایت کې۲۰ تنه کروندګرو سره د ننداریز کروندو جوړولو په موخه د غنمو اصلاح شوو تخمونو او کیمیاوی سرو مرسته وکړه.
د میدان وردګو ولایت د کرنې، اوبولګولو او مالدارۍ ریاست وایي، چې دغه ننداریزې کروندې د دې ولایت په مرکز میدان، نرخ، جلریز، حصه اول بهسود، مرکز بهسود، چک، سید آباد، دایمیرداد او جغتو  ولسوالیو کې جوړېږي.
د میدان وردګو ولایت دکرنې ریاست چارواکي وایي، چې د ننداریزو کروندو په جوړولو سره کروندګر کولاي شي، چې خپلې تجربې یو له بل سره شریکې کړي.
 دوی زیاته کړه، چې د کتار په بڼه  د اصلاح شوو تخمونو کرکېله کولاي شي، چې د بزګرانو په حاصلاتو کې د پام وړ زیاتوالی راولي او د کتار په بڼه کرکېله کې د ناروغیو مخنیوی او د هرزه بوټو کنټرول په اسانې سره کېږي.
ددغو ننداریزو کروندو دجوړولو موخه نوې او میکانزه کرکیلې سره د بزګرانو بلدتیا او د دوی د کرنیزو حاصلاتو زیاتولو ته زمینه برابرول دي.