د میدان وردګو سيدآباد کې د څارویو خوراکي توکو مرکز پرانيستل شو
٢١ زمری ۱۴۰۲ه.ش
٢٥ مُحَرَّمُ الحَرام ۱۴۴۵ه.ق
د میدان وردګو ولایت د کرنې، اوبولګولو او مالدارۍ رياست دکرنې پراختیا نړیوال صندوق په مالي او د افغانستان لپاره د هالند کمېټې په تخنیکي همکارۍ ددې ولایت سید آباد ولسوالی د تنګي درې ګلاب خېلو په کلي کې د څارویو د خوراکي توکو مرکز جوړ او ګټې اخیستنې ته وسپارل شو.
ددې مرکز د جوړولو ټوليز لګښت ٧٠٠٠ امریکايي ډالرو ته رسېږي، چې موخه یې ددې سیمې مالدارانو ته د څارویو خوراکي توکي چمتو کول دي.
د سیمې خلک د څارویو خوراکي توکو د مرکز له جوړولو خوښ دي او په راتلونکي کې یې د لا نورو همکاریو غوښتنه لري.
