د هلمند مرکز لښکرګاه کې د کیمیاوي سرو له هټیو څارنه او ارزونه وشوه
۱۵ زمری ۱۴۰۱ه.ش
۸ محرم الحرام ۱۴۴۴ ه.ق
دهلمند ولایت د کرنې، اوبولګولو او مالدارۍ ریاست په وړاندیز، ددې ادارې د مسلکي ټیم ترڅنک، یوې گډې کمیټې ته چې په ترکیب کې یې د هلمند د ولایت مقام، امنیه قومندانۍ، د چاپېریال ساتنې ریاست او دکیمیاوي سرو دټولنې استازي شامل دي؛ دنده سپارلشوې ده، چې هلمند کې د کیمیاوي سرو (کودونو) دکارباریانو له دوکانونو تقلبي کیمیاوي سرې راتولې اودکرنې ریاست په گدامونو کې یې زېرمه کړي.
ددې پروسې موخه دادی تر څو ټول هغه ممنوعه کودونه چې د بزګرو کښتونو ته زیان اړوي او له مرکز څخه یې په پېر او پلور بندیز لګول شوی دی مخه ونیول شي .
په همدې موخه نوموړي ټیم د خپل پلان له مخې له ګڼو هټیو لیدنې وکړې ،یو شمېر کاروباریانو خپل دوکانونه د پلاوي له ورتګ څخه د خبرېدو پر مهال وتړل تر څو د څارنې پر مهال یې غیر قانوني کود په نښه نشي.
د نوموړي پلاوي لخوا د تښتېدلو دوکاندارانو د دوکانونو قفلونه مهر کړل شول تر څو خپل تقلبي سرې انتقال او یا هم ونه پلوري او د عالي مقاماتو د حکم له مخې باید ورڅخه ګدامونو ته انتقال کړل شي.
د یادونې وړ ده چې تر دې مهاله نږدې ١٢٢ بوجۍ سلفيت سودیم کیمیاوي کود په کدامونو کې د ګډ پلاوي په حضور کې مصادره شوي دي.
