ارزګان کې ۶۳۰ وچکالۍ ځپلو کوچیانو سره د څارویو د خوراکي توکو مرسته وشوه
۲۶ غبرګولی ۱۴۰۰
د ارزګان دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې (FAO) په مالي او د (HRDA) موسسې په تخنیکي همکارۍ ددې ولایت د مرکز ترینکوټ په ۶۳۰ وچکالۍ ځپلو کوچیانو د څارویو خوراکي توکيوېشلي دي.
د ارزګان دکرنې رییس انجنیر احمدشاه خیري وایي، چې په یادو وچکالۍ ځپلو ۶۳۰ کوچیانو د څارویو دخوراکي توکو د وېش ترڅنګ د دوی د مالونو د خوندي کولو په پار د څارویو د چنجي ضد څلور زره او ۴۱۰ ډوزه واکسینونه هم وېشل کېږي.
په همدې حال کې د (HRDA) موسسې ولایتي مسوول عصمت الله اتل وویل، چې یاده موسسه د ارزګان ولایت د کرنې، اوبولګولو او مالدارۍ په برخه کې له مالدارانو او بزګرانو سره مرسته او همکارۍ کوي، چې لومړی برخه یې پر ۶۳۰ وچکالۍ ځپلو کوچیانو د څارویو د خوراکي توکو وېش دی. دغه راز د همدې موسسې له لارې به شاوخوا زر تنه د اوبولګولو په برخه کې په لنډ مهالو دندو وګمارل شي او ترڅنګ یې شاوخوا په زرو بزګرانو به د غنمو او سبو د اصلاح شویو تخمونو دوېش ترڅنګ به پر دوی کیمیاوي سرې هم ووېشل شي.
