لغمان کې د شولې عصري کرکېلي په پار ۶۰ ننداریزې کروندې جوړېږي
۵ غویی ۱۴۰۰
د لغمان دکرنې، اوبولګولو اومالدارۍ ریاست له لورې د یاد ولایت په مرکز مهترلام، الینګار، علیشنګ او قرغه یي ولسوالیو کې دکتار په ډول دشولو دعصري کرکېلي د ترویج په موخه د ۶۰ ننداریزو قطعو دجوړولو په پار پر بزګرانو د شولو اصلاح شوي تخمونه وېشل شوي دي.
د لغمان د کرنې، اوبولګولو او مالدارۍ رییس انجنیر محمد جمیل خوشحال وایي چې، یاد ننداریزې کروندې بزګرانو ته دکتار په ډول دشولو کرلو د نوي او عصري میتودونو د زده کړې او رواجولو په موخه جوړېږي. د هغه په خبره دکرنې وزارت له لورې یادو بزګرانو ته ټول تولیدي عوامل په وړیا توګه ورکول کېږي. ښاغلي خوشحال وایي، چې په دې بڼه د شولو کرکېله د شولو حاصلات له ۲۵ تر ۳۰ سلنه زیاتوي.
باید وویل شي، چې په دې وروستیو کلونو کې په لغمان کې د شولې لسګونه ننداریزې کروندې جوړ شوي دي، چې د یادو ننداریزو کروندو له لارې سلګونو بزګرانو ته په عصري بڼه د شولو د کرکېلي د روزنې زمینه برابره شوې ده.
