د نورستان د کرنې ریاست؛ ۱۳۹۹یم مالي کال کې یې مهمې کړنې څه دي؟

۱۰ مرغومې ۱۳۹۹
د نورستان د کرنې، اوبولګولو او مالدارۍ ریاست په ۱۳۹۹یم مالي کال کې ددې ولایت د کرنې، بڼوالۍ، طبیعي سرچینو او مالدارۍ د پراختیا او وضعیت ښه کولو په پار د ۱۸ میلیونه او ۳۳۷زره او ۸۴۴ افغانیو بودیجې په لګولو سره د کرنیزو محصولاتو مدیریت د پروژې ترڅنګ ګڼې پروژې پلي کړي دي، چې ورسره په یادو برخو کې د پام وړ پرمختګونه تر سترګو کیږي. یاده بودیجه ددې ولایت د مرکز په ګډون په ټولو ولسوالیو کې د کرنې، مالدارۍ، بڼوالۍ، طبیعي سرچینو او اوبولګولو په بېلابېلو برخو کې لګول شوی دی.
د نورستان دکرنې ریاست چارواکي وایي، چې سږکال په دې ولایت کې د کرنیزو محصولاتومدیریت د پروژې په اډانه د کچالو ۱۷ صفر درجې زېرمتونونه جوړ شوي دي. ددې ترڅنګ په روان مالي کال کې د نورستان په ولایت کې د میکانیزه کرکېلي په پار هم یوشمېر پروژې پلي شوي دي. په دغو پروژو کې، د زعفرانو پنځه ننداریزې قطعې جوړول، پر بزګرانو د زعفرانو د پیازو او اړوندو توکو وېش، د ممپلیو او غنمو ننداریزې قطعې جوړول او پر ۱۹۶۰ بزګرانو ۹۸مټریک ټنه د غنمو اصلاح شویو تخمونو وېش شامل دي. ددغو کړونو ترڅنګ د نورستان د کرنې ریاست له خوا د همکارو موسسو په مرسته یوشمېر بې وزله کورنیو سره نغدې مرستې او پر زرو کورنیو د څارویو د خوراکي توکو وېش هم ددې ریاست سږني کړنې دي.
د چارواکو په خبره روان مالي کال ددې ولایت د بڼوالۍ او ځنګولۍ د پراختیا په پار هم هلې ځلې شوي دي، په روان مالي کال کې د کرنې وزارت د بڼوالۍ او مالدارۍ ملي پروژې له لارې په دې ولایت کې ۱۳۵ جریبه مېوه لرونکي بڼونه جوړول، په ۱۰۰ هکټاره ځمکه کې د جلغوزیو ځنګلونه کرل او د جلغوزیو پر ځنګل لرونکو د جلغوزې د غوټو پرې کولو ۱۲۰ بیاتې ګانې وېشل هغه څه دي، چې سږکال د نورستان د کرنې ریاست له خوا ددې ولایت د بڼوالۍ او ځنګلولۍ د پراختیا په پار تر سره شوي دي. دغه راز د ۲۵۰۰ متر مکعب اوبو په وړتیا سره چک ډمونه او تراشونه جوړول، د سبو د ناروغیو او افتونو د مخنیوي په پار پر بزګرانو درمل وېشل او د دوی کروندې دواپاشي کول او بزګرانو ته روزنه ورکول هم د نورستان د کرنې ریاست سږني لاسته راوړنې دي.
د نورستان د کرنې ریاست چارواکي وایي، چې سږکال ددې ولایت د مالدارۍ برخې ته هم پاملرنه شوې ده، د دوی په خبره، د کانګو تبې ناروغي د مخنیوي په پار پراخ کمپاینونه ترسره شوي دي، څارویو ته ډول ډول واکسینونه ورکړل شوي دي، پر مالدارانو د شېدو د پروسس ۴۳ کڅوړې وېشل شوي دي.
په ورته وخت کې، په ۱۳۹۹یم مالي کال کې د نورستان د نارینه و بزګرانو ترڅنګ ښځینه و بزګرانو ته هم پاملرنه شوي او د کرکېله په برخه کې د ښځینه و بزګرانو د ونډې زیاتولو په پار هم یوشمېر پروژې پلي شوي دي، چې په کې ښځینه و بزګرانو ته ۵۰۰ کورني باغچې جوړول، په کورنیو باغچو کې د کرکېلي او حاصل ټولولو په برخه کې د ښځینه بزګرانو روزل، پر ښځینه و بزګرانو د کورنیو باغچو اړونده توکي وېشل،  پر یادو بزګرانو د بېلابېلو سبو تخمونه او د سبو د پروسس توکي وېشل، ۱۰۰۰ بېوزله مېرمنو ته د هګیو چرګان ورکول او د زعفرانو د کرکېلي او حاصل ټولولو په برخه ۱۷ مېرمنې روزل نور هغه څه دي، چې د نورستان د کرنې ریاست له خوا د روان مالي کال په ترڅ کې ترسره شوي دي.