۱ لړم ۱۳۹۹

د هلمند د کرنې، اوبولګولو اومالدارۍ ریاست وایي، چې په دې ولایت کې دکرنیزو محصولاتو مدیریت د پروژې اړوند د ۵۰ ممیزخونو رغنیزې چارې بشپړ او ګټې اخیستنې ته چمتو شوي دي.

د هلمند د کرنې رییس زلمی الکو وایي، چې په دې ولایت کې د کرنیزو محصولاتو مدیریت د پروژې اړوند د ۷۳ ممیزخونو له ډلې د ۵۰ ممیزخونو رغنیزې چارې بشپړ او ګټې اخیستنې ته چمتو شوي او د پاتې هغو رغنیزې چارې هم ۸۵ سلنه پرمخ تللي چې ډېر ژر به یې پاتې چارې بشپړ او ګټې اخیستنې ته به وسپارل شي.

ښاغلی الکو وویل، چې دغه ممیزخونې ددې ولایت په مرکزلښکرګاه، ناوې، نادعلي او ګرمسېر ولسوالیو کې جوړ شوي دي.

یاد ممیزخونې په دې ولایت کې د کرنیزو محصولاتو مدیریت، د ممیزخونو د صنعت د ترویج، د بڼوالو د اقتصاد لوړولو او د انګورو باغونو د محصولاتو د ارزښت لوړولو په پار په معیاري او اسټنډرد ډول جوړ شوي دي. ددې ترڅنګ دغه ممیز خونې د معیاري او ښه کیفیت لرونکي ممیزو د تولید لامل کیږي او همداراز د انګورو د ضایعاتو مخه نیسي.