۲۲ سلواغه ۱۳۹۸
د خوست ولایت یو شمېر ځوانانو یوه برنامه جوړه کړې او پلي کوي یې، چې پر بنسټ یې ټاکل شوې، چې د خوست په ولایت کې دولتي بنسټونو لپاره د بادامو ۲۰۰ بڼونه (چې هر بڼ کې له ۳۷تر ۳۸ ونې شامل وي) جوړ شي.
دغه ځوانان وایي، چې خوست کې د ۲۰۰ بڼونو په جوړولو کې د دوی په برنامه کې اته زره او ۵۰۰ ونې شاملې دي.
ددغو ځوانانو په خبره، د دوی د برنامې پربنسټ، چې ټاکل شوې خوست کې ۲۰۰ بڼونه جوړ شي، د ثمر ورکولو په پیل سره به درې میلیارډه او ۲۴۰ میلیونه افغانۍ خالص عاید ولري.
د کرنې، اوبولګولو او مالدارۍ وزارت د خوست ولایت د ځوانانو له طرحې او برنامې هرکلی کوي. یاد وزارت ددې طرحې د پلي کولو په پار د هر ډول تخنیکي همکاریو لپاره چمتو دی.
باید وویل شي، چې د کرنې وزارت د ځنګلونو د بیارغونې او له دې طبیعي سرچنیو څخه د عوایدو زیاتولو په پار په روان کال کې له بېلابېلو اړخونو څخه د جلغوزې او پستې ۱۰.۸ میلیونه نیالګي چمتو کړی دی، چې جلغوزې یې د خوست، پکتیا او پکتیکا په ولایتونو کې او پسته یې په هغو ولایتونو کې چې د پستې ونې لپاره مناسبه هوا او اقلیم ولري، د لېوالو کسانو او د ځنګلولی ټولنو په واک کې ورکول کیږي.