د خوست د کرنې ریاست د ۱۴۰۴ مالي کال د عوایدو راټولولو په برخه کې دویم مقام خپل کړ

۲۴ وری ۱۴۰۵ه‍.ش
۲۶ شَوّالُ المُکَرَّم ۱۴۴۷ه‍.ق
د خوست ولایت د کرنې، اوبو لګولو او مالدارۍ ریاست د ۱۴۰۴ مالي کال په اوږدو کې د عوایدو راټولولو په برخه کې د پام وړ لاسته راوړنه تر لاسه کړه. یاد ریاست وتوانېد چې د ټول هېواد په کچه د کرنې ریاستونو ترمنځ د خپل ټاکلي موخې څخه د ۳۴ سلنه زیاتو عوایدو په ترلاسه کولو سره دویم مقام خپل کړي.
د خوست کرنې ریاست د تېر مالي کال په لړ کې د عوایدو کچه د ټاکل شوې موخې څخه ۳۴ سلنه زیاته کړې، چې دا د مسوولینو ژمنتیا، شفافیت او مسلکي مدیریت څرګندونه کوي.
دغه عواید د کرنې ریاست د بېلابېلو آمریتونو له لارې راټول شوي دي، چې پکې د قدرتي سرچینو، کرنیزو چارو، اراضۍ، مالدارۍ آمریتونه، د مالي او اداري عمومي مدیریت شامل دي. د یادونې وړ ده، چې دا ۳۴ سلنه زیاتوالی د عشر او زکات له عوایدو پرته ترلاسه شوی دی.
دا لاسته راوړنه په داسې حال کې ترلاسه شوې چې د هېواد په ګڼو ولایتونو کې کرنیز سکتور له اقلیمي بدلونونو او طبیعي پېښو سره مخ دی. سره له دې ننګونو، د خوست کرنې ریاست د نوښتګرو کړنلارو او اغېزمنو تدابیرو له لارې نه یوازې خپل عواید لوړ کړي، بلکې د نورو ولایتونو لپاره یې یو بریالۍ او الهام‌ بښونکي نمونه هم وړاندې کړې ده.
د خوست د کرنې ریاست مشرتابه ټینګار کوي، چې د عوایدو زیاتوالی به د کرنیزو خدمتونو د پراختیا، د بزګرانو د ملاتړ، د اوبو لګولو سیستمونو د ښه والي، د ځنګلونو د ساتنې او پراختیا او د مالدارۍ سکتور د پیاوړتیا په برخه کې مهم رول ولوبوي. 
همدارنګه، یاد ریاست ژمن دی چې په راتلونکو کلونو کې به لا زیاتې هڅې وکړي تر څو لا لوړ مقامونه خپل کړي او د کرنې سکتور لا پیاوړی کړي.
د خوست د کرنې ریاست دا بریا د ټولو کارکوونکو د ګډو هڅو، صادقانه کار او مسوولیت مننې پایله بلل شوې ده، او هیله څرګندېږي چې دا پرمختګونه به په راتلونکو کلونو کې نور هم دوام ومومي.