د لغمان د کرنې رییس د اکشن اېډ مؤسسې د ختیځ زون مسؤل سره وکتل
۱۳ کب ۱۴۰۴ه.ش
۱۵ رَمَضانُ المُبارَک ۱۴۴۷ه.ق
د لغمان د کرنې، اوبولګولو او مالدارۍ ریاست رییس مولوي سلیمان ایمن د خپل کار په دفتر کې د اکشن اېډ مؤسسې د ختیځ زون له مسؤل ادم خان نیازی سره وکتل.
په دې ناسته کې د کرنیزو چارو آمر انجنیر بریالی همدرد، تخنیکي سلاکار سردار زیار او د پلان او برنامو د همغږۍ لوی مدیر عبیدالله قریشي هم ګډون درلود.
په دې کتنه کې د اکشن اېډ مؤسسې د ختیځ زون مسؤل وویل، چې په لغمان ولایت کې د دوی له لوري یوه دوه کلنه پروژه منظور شوې ده، چې پکې د ۴۰۰ جریبه مالټو او سره املوکو بڼونو جوړول، د سبو د کورنیو باغچو ایجاد، د اصلاح شوو تخمونو وېش، د مرخېړیو کښت، د سبو د اصلاح شوو تخمونو وېش او همداراز د څارویو د متوازنې خوراکې توکو وېش شامل دي.
نوموړي زیاته کړه، چې دا مهال د بڼونو د جوړولو پروژه تطبیق کوو او د فعالیتونو د ښه تطبیق لپاره یې د کرنې ریاست له مشرتابه څخه د همکارۍ غوښتنه وکړه.
په همدې حال کې د کرنې رییس مولوي سلیمان ایمن د راغلو مېلمنو هرکلی وکړ او د یادې پروژې د تطبیق په برخه کې یې د اصولي همکارۍ ډاډ ورکړ. نوموړي ټینګار وکړ چې پروژه باید په بشپړ شفافیت او د منظور شوي پروپوزل مطابق پلې شي.
