بغلان ولایت کې د ۳۰ ټنه لوړکیفیته شاتو تولید او عرضه
۲ سلواغه ۱۴۰۴ه.ش
۳ شَعبان المُعَظّم ۱۴۴۷ه.ق
د بغلان ولایت د کرنې، اوبو لګولو او مالدارۍ ریاست اعلان کړی، چې د مالدارۍ او څارویو د روغتیا آمریت د مسلکي او تخنیکي کارکوونکو په همکارۍ او لارښوونو، د شاتو مچیو ۷۶ فعال فارمونه توانېدلي دي، چې د روان کال په ترڅ کې ۳۰ ټنه خالص او لوړکیفیته شات تولید او بازار ته وړاندې کړي.
د یاد ریاست د معلوماتو له مخې، د شاتو مچیو فارمونه د بغلان ولایت په ۱۰ ولسوالیو کې، چې مرکزي بغلان، نهرین، خنجان، بنو، دهصلاح، پلحصار، برکه، خوست، دندغوري او د پلخمري مرکز پکې شامل دي، فعالیت لري او د شاتو د تولید د زیاتوالي او د سیمې د اقتصاد د پیاوړتیا په برخه کې یې مهم رول لوبولی دی.
د بغلان د کرنې ریاست چارواکي وایي، چې د دې ولایت اقلیم او د هوا شرایط د شاتو مچیو د روزنې د ودې او پراختیا لپاره ډېر مناسب دي او دې صنعت توانېدلی، چې شاوخوا ۷۰۰ تر ۸۰۰ کسانو ته د مستقیم کار زمینه برابره کړي.
همدارنګه ټینګار شوی، چې په بغلان ولایت کې د شاتو مچیو د روزنې صنعت د ودې په حال کې دی او د کرنې ریاست د اړوندو ادارو د همکارۍ په جلبولو سره، د دې برخې له روزونکو او فعالانو څخه هر اړخیز ملاتړ کوي.
د بغلان دکرنې ریاست د مالدارۍ او څارویو د روغتیا آمریت په وینا، په بغلان ولایت کې د شاتو مچیو د فارمونو د پراختیا او د کورنیو تولیداتو د پیاوړتیا لپاره هڅې لا هم روانې دي.
