د کندهار ارغنداب کې د ځنګلي بوټو پرېکولو او ملي شتمنیو د ساتنې په موخه څارنه ترسره شوه

۲۶ تله ۱۴۰۴ هـ.ش
۲۵ رَبِیعُ الْثاني ۱۴۴۷ هـ.ق
د کندهار د کرنې، اوبولګولو او مالدارۍ ریاست تر رهبرۍ لاندې، د ارغنداب ولسوالی په رود خونو او څړځایونو کې د ځنګلي بوټو د پرېکولو، طبیعي زېرمو د ساتنې او د خلکو د عامه پوهاوي په موخه څارنه ترسره شوه.
یاده څارنه د ارغنداب ولسوالی د کرنې او مالدارۍ مسؤل د ځانګړې لارښوونې پر بنسټ، د یادې ولسوالی د ځنګلونو او څړځایونو د تنظیم مسؤل، او امنیتي مسؤولینو په ګډه همکاري ترسره کړې ده.
د څارنې پر مهال د سیمې اوسېدونکو او مالدارانو ته د ځنګلونو او ملي شتمنیو د ارزښت، د هغوی د ساتنې او د ناقانونه انتقال د مخنیوي په اړه پوهاوی ورکړل شو. د ارغنداب په رود خونو کې دا څارنه په ځانګړي ډول د دې لپاره ترسره شوې، څو د شګې او جغل د انتقال پر مهال طبیعي زیرمې له زیان څخه خوندي پاتې شي او خلک د طبیعي شتمنیو په ارزښت ښه پوه شي.
همدارنګه د سیمې له خلکو او کوچیانو څخه غوښتنه وشوه، چې د جغل د انتقال پر مهال د طبیعي بوټو او زېرمو د زیان مخنیوی وکړي او د ملي شتمنیو په ساتنه کې فعاله ونډه واخلي.
د یادونې وړ ده، چې له دې وړاندې هم په سپین بولدک، پنجوايي او ډنډ ولسوالیو کې د ځنګلي، نیمه‌ځنګلي او طبیعي بوټو د ناقانونه انتقال او عامه پوهاوي په موخه ورته څارنې ترسره شوې وې، چې په پایله کې یې سلګونه سیمه‌ییز اوسېدونکي د ملي شتمنیو د ساتنې په ارزښت او اهمیت وپوهېدل.