د خوست دکرنې رییس: په ګربزو ولسوالی کې د فوموګیشن مرکز بیرته فعال شو

۱ زمری ۱۴۰۴ ه‍.ش
۲۷ مُحَرَّمُ الحَرام ۱۴۴۷ه‍.ق
د خوست دکرنې، اوبولګولو او مالدارۍ ریاست چارواکي وایی، چې د خوست ولایت د ګربزو ولسوالی اړوند سیمه کې د ګندا فروټ شرکت تر چتر لاندې د فوموګیشن مرکز یو ځل بیا فعال شو او خپل فعالیت یې له سره پیل کړ.
په یاد مرکز کې به هغه کرنیز محصولات چې ګاونډي هېواد پاکستان ته صادرېږي یا له هغه ځایه واردېږي، د نباتي ناروغیو او آفتونو د مخنیوي په موخه فوموګیټ (درمل شیندنه) شي، ترڅو دا صادراتي او وارداتي توکي د نړۍوالو معیارونو سره سم پاک او خوندیتوب تضمین شي.
د فوموګیشن سنټر د بیا فعالېدو په مراسمو کې د خوست ولایت د کرنې، اوبو لګولو او مالدارۍ ریاست مرستیال مولوي اسلام خان منیب او ورسره مل پلاوي ګډون کړی و. ښاغلی منیب د فوموګیشن بهیر د کرنیزو محصولاتو په وارداتو او صادراتو کې یو مهم، تخنیکي، مؤثر او نړۍوال معیار بللی او ویې ویل چې دا پروسه د افاتو پر وړاندې د مبارزې یو منل شوی میتود دی چې د محصولاتو کیفیت او خوندیتوب تضمینوي.
نوموړي زیاته کړه، چې یاد مرکز د ټولنیز، اقتصادي او تجارتي ارزښت له مخې ځانګړی اهمیت لري، او د خوست د کرنې ریاست له لوري د هر اړخیزې همکارۍ ډاډ ورکړ.
دغه پرمختګ به د کرنیزو محصولاتو د صادراتو د اسانښت ترڅنګ د خوست بزګرانو ته د بازار موندنې په برخه کې هم مهم فرصتونه برابر کړي.