د لغمان په درېیو ولسوالیو کې ۱۵۶ بزګرانو ته د سویابینو تخم او کیمیاوي سرو وېش لړۍ پیل شوه
د لغمان د کرنې، اوبولګولو او مالدارۍ ریاست له لوري، د خوړو او زده کړې نړۍوالې مؤسسې (ان،آی،اې) په مالي ملاتړ، د سویابینو د کرلو د هڅونې په موخه، د لغمان په مرکز مهترلام، علینګار او دولتشاه ولسوالیو کې ۱۵۶ مستحقو بزګرانو ته د سویابینو تخم او کیمیاوي سرې وېش لړۍ پیل شو.
په دغه مرسته کې هر بزګر ته د نیم جریب ځمکې لپاره شپږ کیلوګرامه د سویابینو اصلاح شوی تخم، نهه کیلوګرامه توره کیمیاوي سره،۲.۵ کیلوګرامه سپینه کیمیاوي سره ورکول کېږي.
د مرستو د وېش مراسم د لغمان د کرنې رییس مولوي عبدالستار محمد له لوري، د خوړو او زده کړې نړۍوالۍ مؤسسې د استازو په حضور کې، د مهترلام له مستحقو بزګرانو څخه رسماً پیل شول.
د وېش پر مهال، مولوي عبدالستار محمد له یادې مؤسسې مننه وکړه، چې د اړمنو بزګرانو ملاتړ کوي. نوموړي وویل، چې سویابین نه یوازې اقتصادي ارزښت لري، بلکې د ماشومانو د خوارځواکۍ په کمولو او د خلکو د غذایي رژیم د پیاوړتیا لپاره هم مهم نبات دی.
مولوي عبدالستار محمد له بزګرانو وغوښتل، چې یاد تخمونه د کرنې ریاست د مسلکي ټیم او د مؤسسې د تخنیکي کارکوونکو تر لارښوونې لاندې وکري، تر څو د کرکېلې بهیر اغېزناک واقع شي او مطلوب حاصل تر لاسه شي.
