هرات کې د قزاقستان هېواد له سفیر سره د کرنې، سوداګرۍ او پانګونې د پراختیا په موخه ناسته وشوه  

۹ کب ۱۴۰۳ه‍.ش
۲۸ شَعبان المُعَظّم ۱۴۴۶ه‍.ق
د هرات ولایت د کرنې، اوبو لګولو او مالدارۍ ریاست، سوداګرو او پانګوالو د قزاقستان له سفیر ګزیز اکباسوف سره ناسته ترسره کړه.
په دې ناسته کې د کرنې رئیس الحاج آخندزاده ملاعبدالحی منیر، د بهرنیو اړیکو د استازولۍ رئیس ډاکټر محمد اسماعیل سلیم، د چاپېریال ساتنې رئیس مولوي عبدالعلي متقي، یو شمېر امارتي چارواکو او د کرنې او مالدارۍ اتحادیو غړو ګډون درلود.  
ناسته د قران کریم د مبارکو آیتونو په تلاوت پیل شوه او د کرنې ریاست له لوري راغلو مېلمنو ته ښه راغلاست وویل شو. دواړو لوریو دغه ناسته د لا ښې همغږۍ او اقتصادي همکاریو د پراختیا لپاره مهمه وبلله.
د قزاقستان سفیر ګزیز اکباسوف، د هرات د خصوصي سکتور، سوداګرو او د کرنیزو او مالدارۍ محصولاتو تولیدوونکو سره د لیدنې خوښي څرګنده کړه او ویې ویل، چې قزاقستان غواړي په افغانستان کې سوداګریز فعالیتونه پراخ کړي او د پانګونې زمینې پراخې کړي.
د ناستې په پای کې، ګډونوالو د کرنیزو او مالدارۍ محصولاتو له نندارتون څخه لیدنه وکړه، چې پکې غالۍ، زعفران، شات، ممیز، وچه او تازه مېوه، طبی بوټي، لبني محصولات او نور توکي نندارې ته وړاندې شوي وو.