د کندهار پنجوایي کې یوشمېر مالدارانو ته د مالدارۍ توکي او د څارویو درمل ووېشل شول

د کندهار د کرنې، اوبو لګولو او مالدارۍ ریاست په هڅه، د اروپایي ټولنې په مالي ملاتړ، د هالنډ کمیټې په تخنیکي همکارۍ او د پنجوایي ولسوالی د کرنې او مالدارۍ مسؤلینو تر مستقیمې څارنې لاندې، د یوې روڼې او شفافې پروسې له لارې، ۲۰ تنو اړمنو او بېوزله مالدارانو ته د مالدارۍ اړین توکي او د څارویو روغتیا لپاره درمل ووېشل شول.
په دې مرستې کې هر مالدار ته د مایع ګاز ډبه، شېدو راټولولو لپاره فلزي سطل، د شېدو د انتقال لپاره فلزي ډبه، د شېدو مایع کولو لپاره فلزي لوښی (کټوه)، د شلومبو مایع کولو لپاره فلزي غړکه، جالۍ، لوټه، دستکشې، بورس، او همدارنګه د څارویو روغتیا ته د پاملرنې په موخه ۵ قلمه ډول دول درمل ورکړل شوه.
د دې مرستې موخه د مالدارانو اقتصادي ملاتړ، د هغوی لپاره د مالدارۍ اړینې اسانتیاوې برابرول، د هغوی اقتصادي وضعیت ښه کول، او د کورنیو اړتیاوو پوره کول دي، ترڅو مالداران وکولای شي له دې مرستې څخه ګټه پورته کړي.
د یادونې وړ ده، چې څه باندې دوه اوونۍ وړاندې، دغو مالدارانو هر تن ته ۲ بلاربې وزې هم وېشل شوې وې، چې اوس ورته د مالدارۍ اړین توکي او درمل ورکړل شوه.