قرغیو کې د «یووالي» د اوبولګولو کانال ګټې اخیستنې ته وسپارل شوه

۱۶ وږی ۱۳۹۸
د لغمان ولایت دکرنې، اوبولګولو او مالدارۍ ریاست چارواکي وایي، چې ددې ولایت د قرغیو ولسوالۍ د «یووالي» د اوبولګولو کانال د جوړولو چارې بشپړ او ګټې اخیستنې ته وسپارل شوه.
د لغمان د کرنې رییس وایي، دغه کانال چې ۶.۸ کیلو متره اوږدوالی لري د کرنې وزارت په کرونده کې د اوبو د تنظیم پروژې له خوا د ۹.۳ میلیونه افغانیو په لګښت جوړه شوې ده، چې په کې د یاد کانال د دواړو خواوو شپږ زره او ۸۳۰ متره پاخه کاري، ۱۹۲ ورخونه، ۱۵ پلچکونه او څلورو ګودرونه شامل دي.
دغه کانال یو زر او ۴۶۰ جریبه ځمکه خړوبوي او ۳۰۸ کورنۍ ور نه هراړخیزه ګټه پورته کوي.