لغمان کې د سویابینو ۲۰ننداريزې کروندې جوړېږي

۱۷چنګاښ ۱۴۰۰
د لغمان د کرنې، اوبولګولو او مالدارۍ ریاست په دې ولايت کې د سويابينو د کرکېلي پراختيا او ترويج په پار د سويابينو ۲۰ننداريزې کروندې جوړوي.
دلغمان دکرنې رييس انجنير محمد جميل خوشحال وايي، چې ددغو ننداريزو کروندو جوړولو په پار بزګرانو ته د سويابينو اصلاح شوي تخمونه او کيمياوي سرې ورکړل شوي دي.
د ښاغلي خوشخال په خبره هر بزګر ته ۱۲کيلو ګرامه د سويابينو اصلاح شوي تخم، ۲۰ کيلو "DAP" او ۱۵ کيلو يوريا سره ورکړل شوي دي.
تر دې وړاندې هم  د لغمان د کرنې ریاست  په همکارۍ د لغماني کروندګرو له خوا په دې ولایت کې د سویابینوکرکېله شوې وه، چې  بزګرو ورڅخه د قناعت وړ حاصلات ترلاسه کړل.  څېړنو ښودلې چې لغمان ولایت کې دسویابینو کښت ښه حاصل ورکوي.
د لغمان د کرنې ریاست  هڅه کوي، چې لغمان کې سویابین ترویج کړي او راتلونکو کلونو کې دالړۍ نوره هم وغځوی او د ولایت په کچه ترې ټول ځمکوال برخمن کړي.
سویابین بشپړه پروتیني او مغذي مواد لري او د کورنیو په روغتیا په ځانګړي ډول د ماشومانو د خوارځواکۍ په مخنیوی کې رغنده رول لري