د کورنیو اقتصادي پیاوړتیا په پارهڅې؛ ننګرهار کې ۲۰۰ اړمنو کورنیو ته د چرګانو واړه فارمنه جوړېږي
۴ زمری ۱۴۰۲ه.ش
۹ مُحَرَّمُ الحَرام ۱۴۴۵ه.ق
د ننګرهار ولایت د کرنې، اوبولګولو او مالدارۍ ریاست د اروپایي ټولنې په مالي او د افغانستان لپاره د هالنډ کمېټې په تخنیکي همکارۍ ددې ولایت چپرهار، رودات او کوز کونړ ولسوالیو بېلابېلو کلیو کې ۲۰۰ بې وزلو، او اړمنو مېرمنو ته د دوی د کورني اقتصاد د پیاوړتیا په پار د هګیو چرګانو واړه فارمونه جوړوي.
د ننګرهار دکرنې رییس مولوی عبدالستار محمد وویل، چې د دې مرستې په لړکې د ننګرهار په یادو ۳ ولسوالیو کې ۲۰۰ کورنيو ته د هګۍ ورکوونکو چرګانو ۳۰ قطعه يې فارمونه او د چرګان روزنې د فارم اړونده توکي وېشل کېږي.
د ننګرهار دکرنې رییس په خبره اوسمهال یادو مېرمنو ته د مرغانچو جوړولو چارې روانې دي، چي په نږدې راتلونکې کې به بشپړې شي.
ددغو مرستو موخه په دې ولایت کې د چرګانو روزنې صنعت ته پیاوړتیا ورکول او د بېوزله او کونډو مېرمنو اقتصادي ودې ته د کور دننه زمینه برابرول دي.
یاده مؤسسه ددې ترڅنګ مالدارانو ته د چنجیو ضد درملو، واکسینونو، وړیو صنعت او بازارموندنې په برخه کې هم کار کوي.
