کونړ کې ۴۶۵۰ مالدارانو سره د اړینو توکو مرسته وشوه

د کونړ د کرنې، اوبولګولو او مالدارۍ ریاست وایي، چې د ملګرو ملتونو او خوړو او کرنې ادارې په مالي او د افغانستان راتلونکو نسلونو مؤسسې په تخنیکي همکارۍ ددې ولایت پر ۴۶۵۰ مالدارانو د څارویو خوراکي توکي، د شوتلو تخم او د څارویو د چنجیو ضد درمل وېشل شوي دي.
په دې اړه جوړه شوې غونډه کې د کونړ دکرنې، اوبولګولو او مالدارۍ رییس مولوی شېراقا(پیرحبیب الرحمن) وویل، چې د ملګرو ملتونو او خوړو او کرنې ادارې په مالي او د افغانستان راتلونکو نسلونو مؤسسې په تخنیکي همکارۍ ددې ولایت د چپه درې، شیګل، غازي آباد او ناړۍ ولسوالیو پر ۴۶۵۰ مالدارانو ۹۳۰ مټریک ټڼه د څاریو متراکم خوراکي توکي« هر مالدار ته ۲۰۰ کیلوګرامه»،۶.۲ ټنه د شوتلو تخم او ۹۳۰ لیټره د څاریو د چنیجیو ضد درمل وېشل شوي دي.
د کونړ دکرنې رییس وویل، چې ددې مرستې موخه د مالدارانو د څارویو سالمه تغذیه، د څارویو د متراکمو خوراکي توکو ترویجول، د مالدارانو د څارویو د شېدې زیاتول، د مالدارۍ سکټور وده او پراختیا ده او په ټوله کې ددې مرستې موخه داده، چې په بېړنیو حالاتو کې مالداران وکولای شي، چې خپل څاروي ښه تغذیه کړي.