ننګرهار کې ۱۵ زره بزګرانو سره د غنمو د اصلاح شویو تخمونو او کیمیاوي سرو مرسته کېږي
٢۵ چنګاښ ۱۴۰۲ه.ش
٢۸ ذی‌الحِجّة ۱۴۴۴ ه.ق
د ننګرهار دکرنې، اوبولګولو او مالدارۍ ریاست وایي، چې د ملګرو ملتونو د خوړو او کرنې ادارې په همکارۍ ددې ولایت ۱۳ ولسوالیو کې ۱۵ زره بزګرانو سره د غنمو د اصلاح شویو تخمونو او کیمیاوي سرو مرسته کوي.
د ننګرها دکرنې، اوبولګولو او مالدارۍ رییس مولوی عبدالستار محمد وویل، چې د ملګرو ملتونو د خوړو او کرنې ادارې په مالي او د اکشن ایډ مؤسسې په تخنیکي همکارۍ ددې ولایت د ۱۳ ولسوالیو «خوګیانو، شېرزاد، سره رود، چپرهار، بټي کوټ، شینوارو، کامه، کوزکونړ، دوربابا، سپین غر، حصارک، رودات او کوټ کې ۱۵ زره بزګرانو سره د غنمو اصلاح شويو تخمونو او کیمیاوی سرو د مرستو په پار سروي روانه ده، چې په ځینو ولسوالیو کې سروي پاي ته رسېدلی ده.
د چارواکو په خبره ددې مرستې په ترڅ کې هر بزګرته دغنمو ۵۰ کیلو اصلاح شوي تخم، ۵۰ کیلو توره او ۵۰ کیلو یوریا سره ورکول کېږي.
باید وویل شي، چې تېرکال د یادې ادارې له لورې د ننګرهار په ۲۲ ولسوالیو کې ۲۷ زره او ۸۵۰ تنو بزګرانو سره دغنمو د اصلاح شويو تخمونو او کیمیاوي سرو مرسته ترسره شوې وه ترڅو بزګران پر ځان بسیا او د خوړو خوندیتوب رامنځته شي.
