د لغمان د کرنې رییس د ملګرو ملتونو د خوړو او کرنې ادارې چارواکو سره وکتل
١٥ چنګاښ ۱۴۰۲ه.ش
١٨ ذیالحِجّة ۱۴۴۴ ه.ق
د لغمان دکرنې، اوبولګولو او مالدارۍ رییس الحاج مولوي محمد ولي محسن د ملګرو ملتونو د خوړو او کرنې ادارې د ختيځ زون مسؤل خوشحال آصفي دیادې ادارې د مالدارۍ برخې مسوول داکتر معروف جلیلي او د ( اکشن ایډ)دفتر د کرنې او مالدارۍ دبرخې مسول انجنیر عبدالله جان حلیمزی سره د خپل کار په دفتر کې د کتنې په ترڅ کې پر بېلابېلو موضوعاتو خبرې اترې وکړې.
په دې لیدنه کې د ملګرو ملتونو د خوړو او کرنې ادارې د ختيځ زون مسوول خوشحال آصفي د یادې ادارې پر ترسره شویو او راتلونکو برنامو خبرې وکړې هغه وویل:"د ملګرو ملتونو د خوړو او کرنې ادارې په مالي او د اي.اي، ادارې په تخنیکي همکارۍ ٧٢٧کورنیو ته د چرګانو د وېش ترڅنګ،٢٠٥٨بزګرانو ته کرنیز ابزار،٥٠٧٣کورنیو ته دسبو تخمونه،٤٣٥٩ مالدارانو ته د څارویو خوراکي توکي وېشل شوي دي.
ښاغلی آصفي وویل یاده اداره په پام کې لري، چې د ولایت په کچه ټولو ولسوالیو ته دغنمو اصلاح شویو تخمونو د وېش ترڅنګ ٣٠ کانالونو د جوړولو او بیارغونې په بهیر کې مستحقو خلکو ته نغدې مرستو ویشنه،٥٠بابه واړه شنې خونې نصب او داسې نور پروګرامونه پلي کړي.
ښاغلی اصفي دیادو برنامو دموثره پلي کېدلو کې دلغمان دکرنې اومالدارۍ ریاست همکارۍ دقدر وړ یاده کړه او په راتلونکې کې یې د همکاریو د لازیاتوالي غوښتنه وکړه.
،ورپسی دلغمان کرنې، اوبولګولو اومالدارۍ رییس الحاج مولوی محمد ولي محسن ددې ولایت په کچه د کرنې اومالدارۍ سکتور په اړه د ولسونو ستونزې او غوښتنې په تفصیلي توګه شریکې کړې.
