د ننګرهار دکرنې ریاست: ختيځ زون کې د ولسوالیو اقلیم ته په کتو باید د غنمو اصلاح شوي تخمونه تولید شي
د ننګرهار دکرنې، اوبولګولو او مالدارۍ ریاست چارواکي وایي، چې ختیځ زون کې د ولسوالیو اقلیمي شرایطو ته په کتو باید د غنمو اصلاح شوي تخمونه تولید او پر بزګرانو ووېشل شي.
په همدې موخه د ننګرهار د کرنې ریاست اړوند تخمونو ته د تصدیق ورکړي امریت کې جوړه شوي غونډه کې د ننګرهار د کرنې، اوبولګولواو مالدارۍ ریاست مرستیال قاری فضل الرحمن صادق د یو شمېر کرنیزو تخمونو تولیدي شرکتونو مسؤلینو ته وویل، چې راتلوونکې کې باید په ختیځ زون کې د تخمونو تولیدي شرکتونه د ولسوالیو اقلیم ته په کتو د غنمو اصلاح شوي تخمونه تولید او کروندګرو ته په واک کې ورکړي تر څو کروندګر وکولای شي راتلوونکې کې هم ترې استفاده او ګته پورته کړي.
صادق همداراز تخمونو ته د تصدیق ورکړی امریت ته هم سپارښتنې وکړې او زیاته يې کړه، دا چې د غنمو حاصلاتو راټولولو وخت را نږدې شوي دي، د اصلاح شوو تخمونو تفتیش کې باید ډیر دقیق اوسئ، او د هغه شرکتونو تولید شوو تخمونو ته تصدیق ورکړئ، چې د تفتیش ټولی مرحلې يې بشپړې کړي وي او په تخمونو کې يې ستونزه نه وي.
په همدې حال د افغانستان د تخمونو تولیدي ټولنې په استازولی انجینر محمد نعیم ودان د تولیدی شرکتونو د ستونزو تر څنګ وړاندیز وکړ او زیاته يي کړه، چې باید د تخمونو تولیدی شرکتونو ته امارتي ځمکې په اجاره ورکړل شي، تر څو د ختیځ زون په کچه د بزګرانو د ضرورت وړ با کیفیته تخمونه تولید کړي.
