لوګر کې یوشمېر بزګرانو سره د اصلاح شویو تخمونو مرسته وشوه

د لوګر دکرنې، اوبولګولو او مالدارۍ ریاست د ملګرو ملتونو دخوړو او کرنې نړیوالې ادارې «FAO» په مالي او د افغانستان راتلونکې نسلونو «FGA» مؤسسې په تخنیکي همکارۍ ددې ولایت د مرکز پل علم په ګډون د برکي برک او څرخ ولسوالیو پر ۱۵۰۰ بزګرانو په کورنیو بڼګیو کې د کرکیلې په پار د سبو او ترکاریو اصلاح شوي تخمونه وېشلي دي.
د چارواکو په خبره د سبو په وېشل شویو کڅوړو کې د کدو،رومي بانجانو، ګل پۍ، شلغم، تورو بانجانو، بنډۍ او کرمو تخمونه شامل دي.
ددې مرستې موخه د بزګرانو ملاتړ او په یادو سیمو کې د سبو کرکیلې پراختیا او تولید زیاتوالي ته زمینه برابرول دي.