دکابل سروبي ولسوالی کې د نیالګیو اېښودلو کمپاین پیل شو
دکابل دکرنې، اوبولګولو او مالدارۍ رییس الحاج حافظ شیخ عبیدالله حقاني او یوشمېر نورو سیمه چارواکو په شتون کې دکابل د سروبي په ولسوالی کې د نیالګیو اېښودلو کمپاین پیل شو
ددې کمپاین په پیل غونډه کې د کابل دکرنې رییس الحاج حافظ شیخ عبیدالله حقانۍ د نیالګیو اېښودلو او خوندیتوب پر ارزښت او د شرعي، اخلاقي او چاپېریال ساتنې له نظره د نیالګیو په اېښودلو او خوندیتوب کې د خلکو پر مسوولیتونو خبرې وکړي.
ښاغلی حقاني وویل: «زموږ ډېری هېوادوال په کرنه او مالدارۍ بوخت دي او له دې لارې د خپل ژوند لګښتونه برابروي، نو اړینه خبره ده، چې د هېواد د سمسورتیا او زرغونتیا په پار نیالګي کېښودل شي.»
ښاغلی حقاني وویل، چې د نیالګیو اېښودل جاریه صدقه ده، او هر کس مکلف دی، چې باید نیالګي کېنوي، او په ساتنه کې یې هلې ځلې وکړي.
باید وویل شي، چې دکرنې وزارت له خوا هر کال د کب په میاشت کې د نیالګيو اېښودلو ملي کمپاین پیلېږي، چې په ترڅ کې یې د هېواد په ۳۴ ولایتونو کې میلیونونه مثمر او غیر مثمر نیالګي اېښودل کېږي. د کرنې، اوبولګولو او مالدارۍ وزارت د طبیعي سرچینو لوی ریاست سږکال هم څه باندې دوه میلیونه نیالګي تولید کړی دی او ترڅنګ یې د قوریه لرونکو ټولنې او مؤسسې هم څه باندې ۳۲ میلیونه نیالګي تولید کړي دي او ټآکل شوې ده، چې په ۱۴۰۲ یم کال کې به کېښودل شي.
