د مالدارۍ څېړنې رییس: د بنيحصارڅېړنیز فارم ملي شتمني ده باید حفاظت یې ووشي
دکرنې، اوبولګولو او مالدارۍ وزارت د مالدارۍ څېړنې رییس انجنیر عبدالولي احمدزي په داسې حال کې، چې د حیواني نسلونو د اصلاح آمر انجنیر ذاکر الله حلیمي، د حیواني تغذیې آمر الحاج غلام دستګیر، د حیواني محصولاتو د کیفیت آمر عبدالرحیم میرزاد، د بنيحصارڅېړنیز فارم عمومي مدیر بنورجان زاهد او ددې فارم کارکوونکي یې ملتیا کوله د کابل ښاروالۍ د اتمې ناحیې رییس مولوی عبدالحی، د ناحیې مالي آمر قاري سمیع الله او د ناحیې انجنیرۍ آمر سره وکتل.
ددې لیدنې په ترڅ کې دکرنې وزارت د مالدارۍ څېړنې رییس انجنیر عبدالولي احمدزی وویل: « د بنيحصارڅېړنیز فارم یوه ملي شتمني ده، چې اوموږ ټول که هرڅوک او هر وزارت یا ریاست پورې اړه لرو،ددې فارم د حفاظت او ساتنې په پار باید جدي پاملرنه وکړو.»
ښاغلی احمدزی دغه راز د فارم د پاکۍ او نظافت ساتنې په هکله د ښاروالي یادو چارواکو ته وویل، چې د فارم اړونده سیمې او څلور خواوو کې چې کوم کثافات دي باید لري شي او د فارم څلور خواوې باید پاک شي، ترڅو فارم ته د ناروغیو او مکروبونو د لېږد مخه ونیول شي.
انجنیر عبدالولي احمدزی دغه راز وویل، چې د فارم د حفظ الصحې رعایتولو په پار دې، باید د فارم په سیمه کې ویاله هم پاک او د کلي خلکو ته باید سپارښتنه ووشي، چې د فارم اړوندو سیمو ته خپل کثافات وانچوي.
په همدې حال کې د اتمې ناحیې رییس مولوی عبدالحی په خپلو خبرو کې یاد فارم ملي شتمني وبلله او ژمنه یې وکړه، چې ددې فارم د صفایۍ او پاکوالي په پار به جدي هلې ځلې کوي.
