هلمند کې د بولان طبیعي ځنګل د بیارغونې په پار هڅې

د هلمند ولایت د کرنې، اوبولګولو او مالدارۍ ریاست اړوند د طبعي سرچینو آمریت  له خوا په دې ولایت کې د بولان طبیعي ځنګل ٢٥ جریبه ځمکه ، چې په تېرو کلونو کې سوځېدلي او یا د مختلفو عواملو له امله یې ونې له منځه تللي دي بیا رغولو چارې پیل شوي دي.
دغه چارې د هملند د کرنې ریاست مقام د پلان له مخې د یوه ګډ پلاوي لخوا، د ولایت مقام په ځانګړې همکارۍ پیل شوي دي، چې  نږدې ٢٥ جریبه ځمکه کې به  ٥٠٠٠ اصله زینتي ونې کېنول شي.
د هلمند په مرکز لښکرګاه کې د بولان طبیعي ځنګل یوازنۍ ځنګل دی، چې د سیمې د سمسورتیا او زرغونتیا، د هوا د ککړتیا د مخنیوي او ددې ولایت اوسیدونکو لپاره د تفریح په برخه کې ځانګړې ځای لري.
د هلمند د کرنې اداره هڅه کوي ترڅو ددې ولایت د ځنګلونو او څړځایونو د بیا احیا او پراختیا په برخه کې د خپلو پلانونو له مخې ځانګړی بهبود او نوښت راولي.