د لغمان دکرنې ریاست: د څه باندې ۲۰۲ زره امریکایي ډالرو به ارزښت دوه پروژې پلی کېږي
۳۰ لېندۍ ۱۴۰۱ه.ش
۲۷ جمادي اﻷول ۱۴۴۴ ه.ق
د لغمان دکرنې، اوبولګولو او مالدارۍ ریاست چارواکي وایي، چې د کرنې نړیوالې ادارې (IFAD) په مالي او د افغانستان لپاره د هالنډ کمېټې په تخنیکي همکارۍ د لغمان ولایت د مرکز مهترلام ښار په ګډوه ددې ولایت په پنځو ولسوالیو کې مالدارانو ته د غوره چوپړتیاوو وړاندې کولو په پار دوه سترې پروژې پلي کېږي.
د لغمان دکرنې رییس الحاج مولوی محمد ولي محسن وایي، چې دغه پروژې چې ټولیز ارزښت یې څه باندې ۲۰۲ زره امریکایي ډالرو ته رسېږي د مالدارۍ په بېلابېلو برخو لکه، د واکسینونو پلي کول، د چنجیو ضد درملو وېشل، د وټرنرۍ خدمتونه، د حیواني محصولاتو زیاتوالی، د څارویو د خوراکي ساتنځایونه جوړول، کورني مرغانچې جوړول، کوویډ ۱۹ څخه د ځان ساتنې بستې وېشل، د شېدو د پروسس او حفظ الصحې برخو کې روزنیز پروګرامونه په کې شامل دي.
د لغمان دکرنې رییس دغه راز وویل، چې یادې پروژې د کرنې نړیوالې ادارې (IFAD) په مالي او د افغانستان لپاره دهالنډ کمېټې په تخنیکي همکارۍ د مهترلام ترڅنګ ددې ولایت په پنځو ولسوالیو کې پلي کېږي.
ددغو پروژو د پلي کولو موخه په دې ولایت کې د مالدارۍ سکټور ته پراختیا ورکول او په ټوله کې د مالدارانو وړتیاوې لوړول او د دوی لاسنیوی دی.
