د ننګرهار شېرزاد کې د اوبولګولو د دوو کانالونو د بیارغونې چارې بشپړ او ګټې اخیستنې ته وسپارل شول

د ننګرهار دکرنې، اوبولګولو او مالدارۍ ریاست د (Islamic Relief) مؤسسې په تخنیکي او د ملګرو متلونو پراختیایي ادارې (UNDP) په مالي لګښت د شېرزادو ولسوالی اړوند د پیټلو او مرکې  کانالونو د بیاروغونې چارې بشپړ او ګټې اخیستنې ته وسپارل شول.
په دې اړه جوړه شوې غونډه کې د ننګرهار دکرنې، اوبولګولو او مالدارۍ رییس مولوی عبدالستار محمد، د اقتصاد رییس مولوی امین الله او د یادو سیمو قومي مشرانو ګډون درلود.
د ننګرهار دکرنې رییس مولوی عبدالستار محمد وویل، چې یاد کانالونه د (Islamic Relief) مؤسسې په تخنیکي او د ملګرو متلونو پراختیایي ادارې (UNDP) په مالي لګښت د درېیو میاشتو په ترڅ کې بشپړ کړي دي. 
د ننګرهار دکرنې رییس زیاته کړه، چې ددغو پروژو په ترڅ کې د پیټلو ۴.۵ کیلومټره کانالونه پاک کاري شوي او ترڅنګ یې ۲۹۳ متره استنادي دېوال هم  په اساسي ډول رغول شوی دی او ترڅنګ یې د کانال په مسیر کې درې دروازې جوړې شوي دي او ۹۴۵ کسانو ته دکار زمینه برابره او پنځه زره جریبه ځمکه ترې خړوبېږي.
همداراز په مرکې خېلو کې د  اته کیلو متره کانال د پاک کاري چارې بشپړي شوي، ۳۵۴ متره استنادي دیوال یي په اساسی ډول ورغول شو، چې د پروژې په ترڅ کې ۹۶۷ ځايي خلکو ته پکې د کار کولو زمینه هم برابره شوي وه، چې دیاد کانال په بشپړیدو سره هم مهال ۶۵۰۰ جریبه ځمکو ته د اوبخور اوبه برابرې شوې. 
محمد په یاده غونډه کې په قومي مشرانو غږ وکړه چې د پروژو په تطبیق کې باید د همکارو موسساتو سره پوره همکاري وکړي، هغه همداراز قومي مشرانو ته سپارښتنې وکړي، چې د ځنګلونو پوره ساتنه وکړي او هیچاته اجازه ورنکړي چې ځنګلونه قطع کړي.