د ختیځ زون د چرګانو روزنې ټولنې چارواکو سره ناسته ترسره شوه
د ننګرهار د کرنې، اوبولګولو او مالدارۍ رییس مولوی عبدالستار محمد د خپل کار په دفتر کې د ختیځ زون د چرګانو روزنې ټولنې له چارواکو سره وکتل.
په دې ناسته کې د ټولنې چارواکو خپل یو لړ ستونزې او غوښتنې د ننګرهار د کرنې ادارې رییس سره شریکې کړي، او زیاته يي کړه چې د ګاونډي هېواد پاکستان څخه چې کوم یو ورځني چرګوړي هېواد ته واردېږي بی کیفیته او په لوړ قیمت فارم لرونکو ته تمامېږي، او همدارنګه اوس وخت غټ غوښین چرګان هېواد ته واردیږي چې زموږ فارم لرونکې يي د ستونزو سره مخ کړي دي.
دوی دغه راز وویل، چې د پاکستان څخه باید د غټو غوښینو چرګانو واردول بند شي تر څو کور دننه د چرګانو روزنې او تولید سکتور پیاوړي او فارم لرونکې مو تشویق او تقویه شي.
په همدې حال کې دننګرهار دکرنې ریاست عبدالستار محمد د یادې ټولنې چارواکو ته د هر راز همکارۍ ډاډ ورکړ او زیاته يي کړه، چې ستاسو ستونزې او غوښتنې به د حل په موخه د کرنې، اوبولګولو او مالدارۍ وزارت مقام سره شریک شي.
