پکتیا کې پر یوشمېر مېرمنو د شیدې روغتیایي کڅوړې ووېشل شوې

۳۱ چنګاښ ۱۳۹۸
د پکتیا د کرنې، ابولګولو او مالدارۍ ریاست د کرنې وزارت د بڼوالۍ او مالدارۍ ملي برنامې «NHLP» په همکارۍ ددې ولایت پر ۱۱۰ مالدارو مېرمنو د شیدې لوشلو او ساتلو روغتیایي کڅوړې وېشلي دي.
د پکتیا د کرنې رییس انجنیر محمدالدین مومند وایی، چې د کرنې وزارت د بڼوالۍ او مالدارۍ ملي برنامې په همکارۍ ددې ولایت د مرکز په ګډون د احمداباد، سیدکرم، زرمت، روحاني بابا، وزی ځدراڼ، لجه منګل، څمکنی، اریوب ځاځی او د پټان ولسوالیو پر ۱۱۰ مالدارو مېرمنو د شیدې لوشلو او ساتلو روغتیایې کڅوړې ووېشل شوې.
ښاغلي مومند وویل، چې په دغو کڅوړو کې «ځکی، د شېدو لوی ستل، د شیډو کوچنی سطل، لوټه، دستکشې، ماسک، موزې، د لاس مینځلو شامپو او د شېدو صافولو جالۍ» شامل دي.
ددغو توکو په وېش غونډه کې د پکتیا ولایت مرستیاله اغلې زهره مطهر احمدزۍ په خپلو خبرو کې له مېرمنو سره د کرنې وزارت مرستې او همکارۍ وستایل او له مېرمنو څخه یې غوښتنه وکړه، چې د کرنې او مالدارۍ په پراختیا کې فعاله ونډه واخلي.
باید وویل شي، چې له دغو توکو څخه برخمن شویو مالدارنو ته د مالدارۍ اړونده روزنې هم ورکړل شوي دي.