د لوګر محمدآغې کې د زعفرانو ننداریزې کروندې جوړې شوې
۴تله ۱۴۰۱ه.ش
۲۹صَفَرالمظفّر ۱۴۴۴ ه.ق
د لوګر دکرنې، اوبولګولو او مالدارۍ ریاست د ملګرو ملتونو دخوړو او کرنې ادارې (FAO) په همکارۍ ددې ولایت د محمدآغې په لسوالی کې د زعفرانو د کرکېلي دودولو او پراختیا په پار د زعفرانو ننداریزې کروندې جوړې شوې.
د چارواکو په خبره د لوګزامبورک هېواد په مالي ملاتړ او د ملګرو ملتونو د خوړو او کرنې ادارې په تخنیکي همکارۍ دمحمدآغې ولسوالی ۹ تنو بزګرانو ته ۹ جریبه د زعفرانو کروندې جوړې شوي دي، چې په همدې موخه هر بزګر ته زر کیلوګرامه د زعفرانو پیاز ورکړل شوي دي او د یو فني انجنیر تر سلا مشورې لاندې یې کرکېله پیل شوه.
باید وویل شي، چې راتلونکې کې د لوګر په نورو سیمو کې هم د زعفرانو ننداریزې کروندې جوړېږي.
زعفران غوره ارزښت لرونکي بوټي دي او په هغو سیمو کې چې اوبه یې کمې وي د دې بوټې کرکیله کېږي.
