د لوګر دکرنې ریاست: لسګونه جربیه ځمکه له غصب څخه وژغورل شوه
۳۰ وږی ۱۴۰۱ه.ش
۲۴صَفَرالمظفّر ۱۴۴۴ ه.ق
د لوګر دکرنې، اوبولګولو او مالدارۍ ریاست وایي، چې ددې ولایت اړوند د څرخ ولسوالی ډبر خواجه کلي کې ۱۱۰ جربیه املاکي(دولتی) ځمکه چې د دوه قومونو پرې دعوا وه او کورونه یې پرې جوړ کړي وو له غصب څخه خلاصه شوه او املاکي ثابت شوه.
دغه ځمکه د څرخ ولسوالی د غصب مخنیوی کمېټې او ځایي مسؤولینو په ګډه همکارۍ تثبیت او د قضای امارت له حکم څخه وروسته پرېکړه وشوه، چې یاده ځمکه دولتي ده.
د لوګر د کرنې، اوبولګولو او مالدارۍ رییس، د غصب مخنیوی مرکزی کمېټې غړو او قضای امارت محکمې غړو په همدې موخه څرخ ولسوالی ته په ګډ سفر کې له ځایي خلکو سره ولیدل او د قضای امارت له لوري شوې پرېکړه یې ورته اعلان او د غصب مخنیوی اړونده یې لازمې لارښوونې وکړې.
په پرېکړه کې، ذکر شوی وو چې ټولې املاکي ځمکې به تصفیه کېږي هیڅوک حق نلري، چې دولتي ځمکه غصب کړي،غاصبین به قضايي او عدلي ارګانونو ته ورپېژندل کېږي.
