کندهار کې د دولتي ځمکو د غصب مخنیوی په پار هڅې
۲۳ وږی ۱۴۰۱ه.ش
۱۷ صَفَرالمظفّر ۱۴۴۴ ه.ق
د کندهار دکرنې، اوبولګولو او مالدارۍ ریاست چارواکي وایي، چې په دې ولایت کې د دولتي ځمکو د غصب مخنیوی په پار یې هلې ځلې ګړندي کړي دي.
د چارواکو په خبره ددغو هلو ځلو په دوام د کندهار ولایت د ژړۍ په ولسوالی کې ۶۰۰ جریبه ځمکه د غاصبینو له منګلو خلاص شو.
د ځمکو د غصب د مخنيوي کميټې تر دې دمه په کندهار کې د ډېرو امارتي ځمکو د غصب مخنيوی کړی او د ټول ولايت په کچه د ځمکو د غصب د مخنيوي او د غصب شويو ځمکو د بېرته ګرځولو په موخه يې د عملياتي پلان تطبيق جريان لري.
د دولتي ځمکو له غصب سره د مبارزې کمیټه د ولایت مقام، امنیه قوماندانۍ، د کرنې ریاست، د محکمو او څارنوالۍ، ښاروالۍ او د ښار جوړونې او ځمکو د ریاستونو له استازو څخه جوړه ده، چې مشري یې د کرنې ریاست کوي.
