غزني کې پر یوشمېر مېرمنو د مربا او اچارو جوړولو توکي ووېشل شول
۳۰ چنګاښ ۱۳۹۸
د کرنې، ابولګولو اومالدارۍ وزارت د بڼوالۍ او مالدارۍ ملي برنامې «NHLP» له خوا د بېوزله مېرمنو اقتصادي ودې او دوی ته په کور دننه دکار زمینې برابرولو په پار د غزنې ولایت پر یوشمېر مېرمنو د مربا او اچارو جوړولو توکي وېشل شوي دي.
دغزني د کرنې ریاست چارواکي وایي، چې په دغو وېشل شویو توکو کې ۲۵ بېلابېل توکي شامل دي، چې د اچار او مرباو په جوړولو کې ورڅخه ګټه اخیستل کیږي.
د چارواکو په خبره په کورونو کې د اچار او مربا تولید ګټور کار دی، چې مېرمنو ته د کارې فرصتونو د برابرولو ترڅنګ د دوی په اقتصادي وده کې رغنده رول لري.
ددغو مرستو موخه د مېرمنو اقتصادي ملاتړ او د دوی د کورنیو اقتصادي ودې ته زمینه برابرول دي.
باید وویل شي، چې له دغو مرستو څخه برخمن شوي مېرمنې د مربا او اچارو د جوړولو لارې چارې هم زده کړې ترڅو وکولای شي له دې لارې خپل عواید ډېر او خپل اقتصاد ته وده ورکړي.
