هلمند کې د سبو د اصلاح شویو تخمونو د پروسس لړۍ پیل شو
۲۹ چنګاښ ۱۳۹۸
د هلمند دکرنې، اوبولګولو او مالدارۍ ریاست له خوا ددې ولایت په څېړنیز فارم کې پر یوشمېر سبو او ترکاریو څېړنې روانې دي. ددې ریاست په خبره ددغو سبو له ډلې یو هم رومي بانجان دي، چې دمورني (breader Seed) تخم تولید او پروسس لړۍ یې پیل شوې ده.
د هلمند دکرنې رییس زلمی الکو وویل، چې دغه اصلاح شوي تخمونه تر پروسس او تولید وروسته د اصلاح شویو تخمونو تصدۍ او د هغو شرکتونو په واک کې ورکول کیږي، چې د مورنې تخمونو د کرکیلې جواز ولري، ترڅو تکثیر او وروسته د بزګرانو په واک کې ورکړل شي.
ښاغلی الکو وویل، چې د یادو تخمونو ورایټۍ د هېواد په بېلابېلو ولایتونو کې تر درې کلونو څېړنو وروسته انتخاب شوي دي، چې د لوړ حاصل ترڅنګ ښه خوند او رنګ هم لري او د تجارت وړ دي.
