لغمان کې د ځنګلونو وهنې او د قاچاق د مخنیوي په پار هلې ځلې

دلغمان دکرنې، اوبولګولو او مالدارۍ ریاست چارواکي وایي، چې دکرنې وزارت د هدایت پر اساس په دې ولایت کې د ځنګلونو وهنې او لرګیو قاچاق د مخنیوي په پار هلې ځلې چتکې شوي دي.
په همدې موخه د لغمان ولایت د کرنې، اوبولګولو او مالدارۍ رییس مولوی محمد ولي محسن د علینګار ولسوالی اړوند د سالاب سیمې قومي مشرانو سره د ځنګلونو د ساتنې او بیارغونې په پار له نږدې وکتل.
په دې ناسته کې د لغمان دکرنې ریس مولوی محمد ولي محسن وویل: «ځنګلونه یوه ملي شتمني ده، ساتنه او بیارغونه یي د امارت او ولسونو ګډ مسولیت دی».
د لغمان دکرنې رییس یادو قومي مشارنو ته ډآډ ورکړ، چې امارت د ځنګلونو ساتنې او بیارغونې ته ژمن دی.
په همدې حال کې، قومي مشرانو په خپلو خبرو کې د اسلامي امارت څخه خپل ملاتړ څرګند کړه او خپلې ستونزې یې د کرنې رییس سره شریکې کړې.
دوی وویل، چې د کانالونو بیارغونې، د بادامو، پستې، چهارمغزو بڼونو او د اوبولګولو سیسټمونو ایجادولو ته اړتیالري. 
لغمان کې د ځنګلونو وهنې او لرګیو قاچاق د مخنیوي کمپاین په داسې حال کې پیل شوی دی، چې موده مخکې دکرنې، اوبولګولو او مالدارۍ وزارت دکرنې او مالدارۍ مرستیال مولوی صدراعظم د ځنګلونو د غیر قانوني وهنې او لرګیو قاچاق مخنیوي په موخه د یوې پلاوی په مشرۍ یوشمېر ولایتونو ته سفر وکړ.
په دې سفر کې د یادو ولایتونو د ځنګلونو له بېلابېلو سیمو څخه د لیدنې ترڅنګ له سیمه ییزو چارواکو، د لرګیو سوداګرو، صنعت کارانو او د سیمې له اوسیدونکو سره په کتنه کې د ځنګلونو د وهنې او قاچاق طرحه یې تشریح کړه او د طبیعي ځنګلونو د خوندیتوب په پار خبرې اترې وشوې.