د لغمان په علیشنګ ولسوالی کې ۱۰۰۰ مالدارانو سره د څارویو دخوراکي توکو مرسته وشوه
د لغمان ولایت دکرنې، اوبولګولو او مالدارۍ ریاست د «AREA» مؤسسې په همکارۍ ددې ولایت د علیشنګ ولسوالی پر۱۰۰۰ مالدارانو د څارویو متراکم خوراکي توکي او د شوتلو تخمونه وېشلي دي.
ددې مرستې په لړ کې هر مالدار ته ۲۰۰ کیلو ګرامه د څارویو متراکم خوراکي توکي او د شوتلو درې کیلو ګرامه تخمونه وېشل شوي دي.
د لغمان ولایت دکرنې ریاست چارواکي وایي، چې د څارویو متراکم خوراکي توکي د بېوزله مالدارانو د اقتصادي پیاوړتیا، حیواني محصولاتو زیاتوالی او د مالدارانو د کورنيو خوړو خوندیتوب په موخه وېشلي دي.
بايد وويل شي،چې دکرنې وزارت د همکارو بنسټونو په مرسته د يوې طرحې پر اساس په ټول هېواد کې پر مالدارانو د څارويو د خوراکي توکو د وېش لړۍ پيل کړی دی، چې تر دې دمه زرګونه مالداران ترې برخمن شوي دي
